«Арсенал» ва «Милан» муҳим ўйинларда майдонга тушади. Европа Лигасидаги интригалар

Бугун, 25 октябрь куни Европа Лигасида 3-тур баҳслари ўтказилади. Ўйинларнинг ярми Тошкент вақти билан соат 21:55да, иккинчи ярми эса соат 00:00да бошланади.

«Арсенал»нинг ғалабали серияси давом этадими?

Пайшаба оқшомидаги асосий учрашув «Арсенал» ва «Спортинг» ўртасида кечади. Бу Чемпионлар лигаси учун ҳам муносиб бўлган жуфтликдир. Бу икки жамоа айни вақтда 6тадан очко тўплаган ва гуруҳда биринчи ва иккинчи ўринларни банд этиб турибди. Бугунги учрашув гуруҳ етакчисини аниқлаб беради.

Кейинги 13 йилда илк марта қаторасига 9 учрашувда ғалаба қозонган «Арсенал» ўз сериясини давом эттириш мақсадида Лиссабонга ташриф буюрган. Унаи Эмери «Лестер»га қарши ўйин душанба кунга тайинланганидан хафа бўлганди, премьер лига бу орқали Лондон клубида Европа Лигаси E гуруҳи ғолиблиги ҳал қилинадиган ўйинга тайёргарлик учун бир кундан маҳрум этганди. Бошқа томондан, «Лестер»га қарши аъло даражадаги ўйин жамоа кайфиятини кўтарган, футболчиларнинг деярли барчаси етук жисмоний ҳолатда Португалияга етиб келган. Фақат Монреаль ва Колашинацнинг ўйинда иштирок этиши ҳозирча сўроқ остида турибди.

Гуруҳдаги иккинчи жуфтликда «Ворскла» ва «Қорабоғ» ўзаро куч синашади.

В гуруҳида ким ортиқча?

Германиянинг «Лейпциг» жамоаси ўз майдонида «Селтик»ни қабул қилади. Бу гуруҳда 3та тенг кучли жамоа тўпланган. Иккинчи жуфтлик «Зальцбург» ва «Русенборг»дан иборат.

2 турдан кейин Австрия клуби биринчи ўринга мустаҳкамланиб олган ва энди «Лейпциг» ва «Селтик» иккинчи ўрин учун курашмоқда. Бугунги ўйинда мағлуб бўлган жамоанинг гуруҳдан чиқиш имконияти кескин камайиб кетади.

«Милан» илгарилаб кета оладими? «Марсель»нинг ишлари нима бўлади?
Якшанба куни Женнаро Гаттузо жамоаси Милан дербисида охирги дақиқада гол ўтказиб юбориб, «Интер»га мағлуб бўлди ва А Серия турнир жадвалида охирги ўринга тушиб кетди. Бу «россонери»нинг август ойидан буён илк марта мағлуб бўлиши эди. «Бетис»га қарши ўйиндан олдин ўтказилган матбуот анжуманида журналистлар испан клуби ҳақида эмас, Италия чемпионати ҳақида сўрашди. Лекин «Милан» Европа Лигасини қурбон қилмоқчи эмас. Жамоа «Бетис»ни мағлуб этиб, халқаро майдондаги зафари орқали ички муаммоларни унуттиришга уриниб кўради.

Айни вақтда икки турдан кейин F гуруҳида «Милан» 6 очко тўплаган ҳолда етакчи, «Бетис»да 4 очко бор.

H гуруҳида кутилмаганда «Марсель» охирги ўринга тушиб қолган. Руди Гарсия шогирдлари дастлаб Франкфуртнинг «Айнтрахт» клубига ўз уйида ютқазганди, иккинчи турда Кипрда «Аполлон» билан дуранг ҳисоб қайд этилди. Учинчи тур ўйинида «Айнтрахт» гуруҳ аутсайдерини осонлик билан мағлуб этиб, гуруҳ масаласини ҳал қилиши мумкин, «Марсель» эса «Лацио»га қарши ҳал қилувчи учрашувда майдонга тушади.

Бугун шунингдек, Россиянинг «Зенит» клуби Франциянинг «Бордо» клубини ўз уйида меҳмон қилади. «Челси» ўз уйида БАТЭни имтиҳон қилади, Москванинг «Спартак» клуби Стивен Жерард бошчилигидаги «Рейнжерс» клуби меҳмони бўлади, «Севилья» эса Туркиянинг «Оқҳисор» клубини қабул қилади. 

Европа Лигаси
3-тур 
«А» гуруҳи
«Цюрих»—«Байер» 21:55
АЕК—«Лудогорец» 21:55

«B» гуруҳи
«Зальцбург»—«Русенборг»21:55
«Лейпциг» —«Селтик» 21:55

«C» гуруҳи
«Копенҳаген»—«Славия» 21:55
«Зенит»—«Бордо» 21:55

«D» гуруҳи
«Спартак Трнава»—«Динамо» Загреб 21:55
«Андерлехт»—«Фенербаҳче» 21:55

«E» гуруҳи
«Ворскла» — «Қорабоғ» 21:55
«Спортинг» — «Арсенал» 21:55

«F» гуруҳи
«Дюделанж»—«Олимпиакос» 21:55
«Милан»—«Бетис» 21:55

«G» гуруҳи
«Рейнжерс»—«Спартак» Москва 00:00
«Вильярреал» —«Рапид» 00:00

«H» гуруҳи
«Айнтрахт» Ф —«Аполлон» 00:00
«Марсель» —«Лацио» 00:00

«I» гуруҳи
«Сарпсборг»—«Мальмё» 00:00
«Бешиктош»—«Генк» 00:00

«J» гуруҳи
«Стандард»—«Краснодар» 00:00
«Севилья»—«Оқҳисор» 00:00

«К» гуруҳи
«Яблонец»—«Астана» 00:00
«Ренн»—«Динамо» Киев 00:00

«L» гуруҳи
«Челси»—БАТЭ 00:00
ПAОК—«Види» 00:00