Бразилиядаги президент сайловлари натижалари эълон қилинди 

Бразилияда ўтган президент сайловларининг 2-тури натижаларига кўра Жаир Болсонару ғолиб бўлди. Бу ҳақда Globo канали хабар берди. 

99,99 фоиз сайлов бюллетени қайта ишлангандан сўнг, Социал-либерал партия номзоди Болсонару 55,13 фоиз, Меҳнаткашлар партиясидан Фернанду Аддад 44,87 фоиз овоз тўплагани маълум бўлган.

Янги президент 2019 йил 1 январдан лавозимини бажаришга киришади.

Болсонару президент кампанияси давомида берган барча ваъдаларини бажаришини айтган.

“Барча берилган ваъдалар бажарилади. Мен барчага қўллаб-қувватлов, овозлар ва ишонч учун миннатдорлик билдираман. Биз қаерга боришни истаётганимизни ва Бразилия қаерга бормоқчилигини биламиз. Мен жуда хурсандман ва бизнинг вазифа – мамлакат тақдирини яхши томонга ўзгартиришдан иборатлигини англайман”, деб айтган Болсонару.

Бразилиянинг амалдаги президенти Мишел Темер 29 октябрдан Болсонаруга ҳокимиятни топширишни бошлашини айтган.