Бразилиядаги аттракционда аёл 40 метр баландликдан хавфсизлик арқонисиз отиб юборилди

Бразилияда 21 ёшли аёл хавфсизлик арқони боғланмаган ҳолда баландликдан сакраш оқибатида ҳалок бўлди, деб хабар берди CBS News.

Бахтсиз ҳодиса 13 июнь куни Сан-Паулу штатида жойлашган «Скелет кўприги» аттракционида юз берган. Интернетда тарқалган видеода икки эркак аёлни баланд кўтариб, жарликка улоқтирганини кўриш мумкин. Атрофдагилар қизга хавфсизлик арқони уланмаганини пайқаб, «Йигитлар, арқон!» деб бақирган. Аммо энди кеч эди, аёл 40 метр баландликдан пастга қулаб ҳалок бўлди.

Ҳодисадан кейин уч нафар эркак қасддан одам ўлдириш айблови билан ҳибсга олинган. Расмийларнинг билдиришича, тергов якунида уларга қотиллик айблови қўйилиши мумкин. Ҳозир ҳодиса тафсилотларини аниқлаш ва жавобгарликни белгилаш бўйича тергов ҳаракатлари давом этмоқда.

Маҳаллий матбуот қурбон бўлган аёл 21 ёшли Мария Эдуарду Родригес де Фреиташ экани ҳақида ёзди. У 14 июнь куни Сан-Паулуда дафн этилди.

A 21-year-old woman died during a bridge jump in Limeira, Brazil, after workers allegedly failed to secure her safety rope before she was pushed from a 40-meter-high bridge. pic.twitter.com/EjZwOxqAPR

— Breaking911 (@Breaking911) June 14, 2026

Қайд қилинишича, ушбу кўприкдаги аттракцион Entre Cordas компанияси томонидан ноқонуний ташкил этилган.

Rope jumping деб номланувчи ушбу экстремал спорт турида камроқ чўзилувчан арқондан фойдаланилади. Шунинг учун одам сакраганда юқоридан пастга қараб эмас, балки арғимчоқ каби олдинга ва орқага тебранади.

Ушбу спорт турининг асосчиси ҳисобланган америкалик Дэн Усмон 1998 йилда 35 ёшида айнан rope jumping вақтида ҳалок бўлган эди.