Эрон ўзи ишлаб чиқарган иккита ҳаво ҳужумига қарши мудофаа тизимини синовдан ўтказди

Эрон АҚШ янги санкциялар киритиши ортида “Вилоят 97” ҳарбий машғулотлари давомида “Хўрдод-3” ҳаво ҳужумига қарши тизими ва “Талаш” зенит-ракета мажмуасини синовдан ўтказди. Бу ҳақда Ислом инқилоби қўриқчилари корпуси аэрокоинот кучларига иқтибос келтирган ҳолда Mehr ахборот агентлиги хабар берди. 

Маълум қилинишича, “Хўрдод-3” тизимидан “Сайёд” ракетаси отилган. Ракета нишонга муваффақиятли теккан. Шунингдек, “Талаш” мажмуасидан ҳам 3 та “Сайёд” ракетаси отилган ва бехато нишонга теккан. 

IRNA ахборот агентлигининг қўшимча қилишича, “Табас” мажмуасидан ракета отилган. Машғулотлар давомида “Шаламча” ракетаси ҳам синовдан ўтказилган.

Маълум қилинишича, ҳарбий машғулотлар 5 ноябрда Эрон ҳарбий-денгиз кучлари қўмондони Ҳабибуллоҳ Сайёрий бошчилигида бошланган. Уларда Ислом инқилоби қўриқчилари корпуси кучлари, махсус ҳарбий-ҳаво кучлари ва бошқа қўшинлар иштирок этмоқда. Машғулотлар 2 кун давом этади.