ОАВ: АҚШда Ассанжга айбловлар қўйилди

WikiLeaks асосчиси Жулиан Ассанжга айбловлар қўйилди, деб ёзмоқда The Washington Post.

Хабар қилинишича, АҚШ Адлия вазирлиги Ассанжга нисбатан айбловлар тўғрисидаги маълумотни ошкор этишни режалаштирмаган, бироқ прокурор ёрдамчиси буни ўзи билмаган ҳолда амалга оширган. У хизмат ҳужжатларидан бирида Ассанжга қарши илгари сурилган айбловларни WikiLeaks асосчиси ҳибсга олинмагунга қадар сақлаш лозимлигини билдирган.

Таъкидланишича, Ассанжга қўйилган айбловлар Россиянинг 2016 йилги Америка сайловларига аралашуви бўйича ишда муҳим ўринни эгаллаши мумкин.

Эслатиб ўтамиз, аввалроқ АҚШ Адлия вазирлиги WikiLeaks сайти асосчиси Жулиан Ассанжга айблов қўйишга тайёрланаётгани ва уни АҚШда суд қилишни мўлжаллаётгани хабар берилганди.