Янукович Москвада шифохонага ётқизилди. У судда сўнгги сўзини айтолмайди

Украинанинг собиқ президенти Виктор Янукович жума куни Москва шаҳридаги Склифосовский номидаги илмий тадқиқот институти шифохонасига ётқизилган. «КП» нашрининг ёзишича, у умуртқаси ва тиззасидан жароҳатланган. Клиникадагилар эса Янукович врач кўригидан ўтказилганидан сўнг унга жавоб берилганини таъкидлашмоқда.

«КП» нашрининг ёзишича, Янукович шифохонага қимирлатмасдан келтирилган. «360» телеканалининг хабар беришича, тез ёрдам клиникасига келтирилган беморнинг паспорт маълумотлари Украинанинг собиқ етакчисиники билан тўлиқ мос келади. У шифохонада бир соат кўрикдан ўтказилган ва тизза пайларига қон тўпланиши ташхиси қўйилган.

«КП» маълумотларига кўра, шифокорлар сиёсатчининг умуртқа поғонасида ҳам жароҳат топишган. Тахмин қилинишича, у теннис ўйнай туриб жароҳатланган. Янукович келтирилган шифохона блоки ташрифчилар учун ёпилган, сўнгра у жонлантириш бўлимига ўтказилиб, кейинроқ хусусий клиникага юборилган.

Шифохонага тушиб қолгани боис Виктор Янукович душанба куни Киев шаҳрининг Оболон райони судида давлатга хиёнат қилиш иши бўйича сўнгги сўзини айтиш учун қатнашолмайди. Бу ҳақда ТАСС мухбирига унинг адвокати Александр Горошинский хабар берган.

«Одам шифохонага ётқизилганда судда иштирок этолмайди», — деган у ҳимоячилар Янукович судда сўнгги сўзни айтиб олиши учун суд мажлисини кейинроққа қолдириш масаласини кўтаришларини қўшимча қилган.

Виктор Янукович 2002–2005 ва 2006–2007 йилларда Украина бош вазири бўлган. Леонид Кучма ўз лавозимини тарк этгач, илк марта 2004 йилда президентлик учун курашиб кўрган. Украина МСКнинг дастлабки маълумотларига кўра, у рақиби Виктор Юшченкони ортда қолдирган, бироқ оммавий норозилик намойишларидан сўнг учинчи тур ўтказилган ва унда Янукович ютқазган.

Бироқ, 2010 йилда Янукович президентлик сайловларида ғолиб бўлишнинг уддасидан чиқади. 2014 йилда Киевда бўлиб ўтган Евромайдон намойишлари ва кейин давом этган сиёсий инқироз натижасида лавозимини тарк этади. 2014 йилнинг 23 февралида у Қрим орқали Россияга қочиб ўтади. Россия ҳудудидан туриб у «Украина аҳолисини ҳимоя қилиш, мамлакатда қонунийлик, тинчлик, ҳуқуқ-тартибот, барқарорликни тиклаш учун Россия Федерацияси Қуролли кучларидан фойдаланиш»ни сўраб Владимир Путинга мурожаат қилади.

Украинада Янукович давлатга хиёнат, Украина давлат чегараси ва ҳудудини ўзгартириш мақсадида қасддан ғаразли хатти-ҳаракатлар, тажовузкор уруш олиб боришда ёрдам беришда айбланмоқда. Қораловчилар унинг учун суддан 15 йилга озодликдан маҳрум этиш жазосини сўрашган.