Украина собиқ бош вазири Николай Азаров сиртдан 15 йилга озодликдан маҳрум қилинди

Киевнинг Печёрский туман суди Украинанинг собиқ бош вазири Николай Азаровни сиртдан барча мол-мулки мусодара қилинган ҳолда 15 йилга озодликдан маҳрум қилди, деб ёзди «Суспильне».

Ҳукм 25 ноябрда чиқарилган, аммо иш материаллари фақат 2 декабрда эълон қилинди, деб таъкидлади нашр. Бугун суд ҳукмига украиналик журналистлар эътибор қаратди.

Суд Россияда бўлиб турган Азаровни давлатга хиёнат қилиш ва конституциявий тузумни зўрлик билан ўзгартиришга уринишда айбдор деб топди.

Тергов версиясига кўра, Азаров ўзининг телеграм-канали орқали Россия пропагандасини тарқатган, бунда унга илгари Киевнинг Шевченковский тумани маъмуриятида ишлаган икки нафар Украина фуқароси ёрдам берган. Терговнинг фикрича, улар ёзган, таҳрир қилган ва «нашр қилиш учун кураторларга провокацион матнларни юборган».

Николай Азаров 2010-2014 йилларда Украина бош вазири лавозимида ишлади. Унинг номзодини ушбу лавозимга мамлакатнинг ўша пайтдаги президенти Виктор Янукович таклиф қилган.

2014 йилда Янукович президентлик лавозимидан маҳрум бўлгач, Азаров Украина ҳудудини тарк этиб, Россияга кўчиб ўтди. Украина расмийлари Азаровга қарши бир нечта жиноий иш қўзғатган, айни пайтда у қидирувга берилган.