Америкаликлар чегирмалар кунида 23 млрд доллар сарфлашди

Америкаликлар бу йилги “қора жума” деб аталувчи чегирмалар кунида 23 миллиард доллар сарфлашди, бу ўтган йилгига нисбатан тўққиз фоизга кўпроқ, деб хабар берди Mastercard тўлов тизими. 

АҚШ миллий чакана савдо федерацияси маълумотларига кўра, бу йилги чегирмалар кунида арзонлаштирилган маҳсулотларни сотиб олиш учун 116 миллион нафар америкалик курашга киришган.

Ноябрь ойининг охирги жумасида ўтказиладиган “қора жума” анъанаси қандай пайдо бўлган? 1924 йилда Нью-Йоркдаги Macy's магазинлар тармоғи Шукрона куни муносабати билан Санта-Клаус иштирокида парад уюштирган. Парад вақтида савдо ҳажми ошганлиги қайд этилган ва шундан сўнг бу парад ҳар йили ўтказиладиган бўлган.

Кейинчалик кўплаб магазинлар мижозларни жалб этиш учун Шукрона кунининг эртасига катта чегирмаларни таклиф эта бошлаган.  

“Қора жума” атамаси эса 1960-йилларда Филадельфия шаҳридаги полиция департаментида пайдо бўлган. Полициячилар ўша куни одам ва транспорт гавжумлиги боис зўриқиб ишлашгани учун бу кунни “қора жума” деб номлашган.