Трамп Ҳўрмуз бўғозидан кемалар ўтиши учун тўлов олиш фикридан қайтди

Доналд Трамп Қўшма Штатлар кемаларнинг Ҳўрмуз бўғозидан ўтиши учун тўлов олмаслигини эълон қилди. Бу ҳақда АҚШ президенти Truth Social ижтимоий тармоғида ёзди.

Фото: Reuters

Трампнинг сўзларига кўра, у Яқин Шарқ давлатлари раҳбарлари билан «самарали музокара» ўтказган, шундан сўнг тўловни Форс кўрфази давлатлари Вашингтон билан тузадиган «савдо ва сармоявий келишувлар» билан алмаштиришга қарор қилган.

«Бу сармоялар жуда катта, аммо айни пайтда улар (бу давлатлар) келажаги учун жуда фойдали бўлади», деди Трамп.

Унинг қўшимча қилишича, Ҳўрмуз бўғозини тўлиқ блокада қилиш фақат Эрон портларига борадиган ва у ердан жўнайдиган кемалар, шунингдек, Эрон юкларини ташийдиган кемалар учун сақланиб қолади.

13 июл куни Трамп АҚШ Ҳўрмуз бўғозини ўз назоратига олишини ва у орқали кемаларнинг хавфсиз ўтишини таъминлагани учун мукофот олиш ниятида эканини эълон қилди. Кейинроқ у АҚШ кемалар ўтиши учун оладиган тўлов ташиладиган юк қийматининг 20 фоизини ташкил этишини айтган эди.