«Арсенал» «Тоттенҳэм»га 4та гол урди

Англия чемпионатида 14-турнинг марказий учрашуви Лондонда кечди. «Эмирайтес» стадионида «Арсенал» ва «Тоттенҳэм» ўртасида кечган Шимолий Лондон дербисида мухлислар 6та голга гувоҳ бўлишди.

«Арсенал» биринчи бўлимни 1:2 ҳисобидаги мағлубият билан якунлаган бўлишига қарамай, ўйинни 4:2 ҳисобидаги ғалаба билан якунлади.

Биринчи бўлим бошида Пьер-Эмерик Обамеянг пенальтидан ҳисобни очганди, аммо «шпорлар» 4 дақиқа ичида 2 гол уриб, олдинга чиқиб олишди.

Иккинчи бўлим бошида яна Обамеянг аниқ ҳаракат қилди ва дублни расмийлаштирди. Энди бу габонлик футболчи АПЛдаги голлари сонини 10тага етказди ва тўпурарлар пойгасида яққол пешқадамга айланди.

74-дақиқада жамоанинг яна бир ҳужумчиси Александр Ляказетт меҳмонлар дарвозасини ишғол қилиб, жамоасини ҳисобда олдинга олиб чиқди. 3 дақиқа ўтиб, «канонирлар»нинг уругвайлик легионери Лукас Торрейра якуний ҳисобни ўрнатди. Бу гол унинг «Арсенал» сафидаги биринчи голи бўлди.

85-дақиқада меҳмонлар жамоаси сафида Ян Фертонген қизил карточка олиб майдонни тарк этди.

Шу тариқа, Унаи Эмери шогирдлари мағлубиятсиз сериясини 19 ўйинга етказиб қўйди. Жамоа охирги марта 2-турда, 18 август куни «Челси»га ютқазган эди. 

Энди «Арсенал» очколари сонини 30тага етказиб, турнир жадвалида тўртинчи ўринга кўтарилди, «Тоттенҳэм» очколари «Арсенал»ники билан бир хил бўлсада, тўплар нисбати ёмонлиги туфайли бешинчи ўринга тушиб кетди.

Англия чемпионати
14-тур
Арсенал – Тоттенҳэм 4:2
Голлар: 1:0 – 10, пенальти Обамеянг, 1:1 – 30 Дайер, 1:2 – 34, пенальти Кейн, 2:2 – 56 Обамеянг, 3:2 – 74 Ляказетт, 4:2 – 77 Торрейра.
Арсенал – Лено, Папастатопулос, Холдинг, Колашинац, Мустафи (Гендузи, 71), Мхитарян (Рэмзи, 46), Торрейра, Ивоби (Ляказетт, 46), Джака, Бельерин, Обамеянг.
Тоттенҳэм – Льорис, Вертонген, Дэвис (Роуз, 82), Орье, Фойт, Сиссоко, Дайер, Эриксен, Алли (Уинкс, 79), Сон Хин Мин (Лукас Моура, 79), Кейн.
Огоҳлантиришлар: Вертонген (9), Дайер (32), Мустафи (37), Чака (49), Алли (65), Торрейра (78).
Четлатиш: Вертонген (85).