Малида жангарилар ҳужуми вақтида 42 киши ҳалок бўлди 

Мали шарқида жангарилар ҳужуми оқибатида 42 киши ҳалок бўлди. Бу ҳақда MaliJet маҳаллий портали маълум қилди.

Маълум қилинишича, Менака шаҳри яқинида 11 ва 12 декабрга ўтар кечаси иккита аҳоли пунктига ҳужум қилинган. “Азаваднинг фаровонлиги учун ҳаракат” (MSA) ташкилоти баёнотига кўра, мотоциклларда бўлган бир гуруҳ жангарилар уйларга ўт қўйиб, одамларни ўққа тутган. 

MSA 2016 йилда туареглар қабилаларининг миллий-озодлик ҳаракатининг собиқ аъзоларидан тузилган. 

Малидаги инқироз қўшни Ливияда 2011 йилда Муаммар Каззофийнинг тузуми ағдарилгани оқибатида юзага келган. Ўшанда Мали ҳудудига туареглар қабилаларидан қочқинлар ёпирилган. Улар мамлакатнинг шимолий қисмини эгаллаб, у ерда Азавад давлатини тузишганини эълон қилишган. Кейинроқ туарегларни ушбу ҳудудлардан экстремистлар сиқиб чиқарган.