Россия: АҚШ Украинадаги махфий операциялар учун одамларни жалб қилмоқда

Россиянинг ЕХҲТдаги доимий вакили Александр Лукашевич маълум қилишича, АҚШ Украинадаги махфий операцияларда иштирок этиш учун LinkedIn ижтимоий тармоғи орқали одамларни қидирмоқда. Лукашевичнинг сўзлари РИА «Новости» томонидан келтирилган.

Унинг сўзларига кўра, Россия томони LinkedIn ёрдамида украин тилида гаплаша оладиган АҚШ фуқароларини қидираётган MissionEssential компаниясига «эътибор қаратди». Доимий вакилнинг қайд этишича, уларни «Украинадаги Америка махфий операцияларини таъминлаш» учун ишга ёллашмоқда.

Лукашевичнинг эълонга таянган ҳолда айтишича, номзодлар Украина аҳолиси билан «яширин равишда алоқа ўрнатиши», шунингдек, ҳарбий тайёргарликка эга бўлиши керак.

Шунингдек, доимий вакилнинг эслатишича, канадалик йўриқчилар 10 мингга яқин украиналик ҳарбийни тайёргарликдан ўтказди. Унинг фикрича, Канада шу тарзда Украинанинг «ҳарбийлашиши»га «ҳисса» қўшди.

Эслатиб ўтамиз, аввалроқ Хитой ва Россия кучаядиган бўлса, дунёда фалокат юз бериши тахмин қилинганди.