Шимолий Корея ядросизланишдан батамом воз кечиши мумкинлигидан огоҳлантирди

Шимолий Корея АҚШнинг Пхеньянга қарши сиёсий ва иқтисодий босимни кучайтираётганини қоралади ва Корея яриморолини ядросизлаш бўйича аввал эришилган келишувлардан батамом воз кечиши мумкинлигидан огоҳлантирди. Бу ҳақда Шимолий Корея ташқи ишлар вазирлиги ҳузуридаги АҚШ ишлари институти изоҳида айтилган.    

“Агар АҚШ маъмуриятидаги юқори лавозимли шахслар санкциялар жадаллигини ошириш, босим ўтказиш ва инсон ҳуқуқлари атрофида шов-шув кўтариш йўли билан бизни ядровий қуролдан воз кечишга мажбур қилмоқчи бўлсалар, унда бундан каттароқ хато йўқдир. Аксинча, бу ҳеч кимга номақбул бўлган натижа – Корея яриморолини ядросизлашга йўлни батамом ёпишга олиб келади”, деб айтилган изоҳда.

Таъкидланишича, америкалик юқори лавозимли сиёсатчилар АҚШ ва Шимолий Корея етакчиларининг Сингапурдаги учрашувидан кейин ўтган 6 ой давомида деярли ҳар куни Шимолий Корея номига ҳақоратли сўзлар айтиб келмоқда. Бундан ташқари, Вашингтон шу вақт ичида Шимолий Корея компаниялари ва шахсларига қарши 8 марта янги санкциялар киритган.

Изоҳ муаллифларининг фикрича, АҚШ давлат департаменти шу ҳаракатлари билан Шимолий Корея-АҚШ муносабатларини аввалги йилдагидек кескин кўринишга қайтаришга уринмоқда. 

“АҚШ Шимолий Кореяга максимал босим ўтказиш натижа бермаслигини ниҳоят тушуниши лозим ва икки давлат етакчиларининг Сингапурдаги қўшма баёнотини бажаришга самимий ёндашиши лозим”, деб айтилган изоҳда.