Бугун, 18 декабрь куни ижтимоий тармоқларда Тошкент метросининг «Алишер Навоий» метро бекатида бир қизнинг рельсга тушиб кетгани тасвирланган видео тарқалди. Хабарларда ушбу ҳодиса 15 декабрь куни содир бўлгани айтилганди.
Тошкент шаҳри ИИББ ушбу видео юзасидан маълумот берди. Маълум қилинишича, воқеа шу йилнинг 29 июль кунида юз берган, Гулбаҳор исмли 20 яшар қиз поезд станцияга кириб келаётган вақтда ҳушидан кетиб, рельсга йиқилган, айни вақтда у соғ-омон.
«Электропоезд машинисти фавқулодда тормозланишни ишга солгани туфайли, фожианинг олди олинган. Жабрланувчи енгил жароҳат олган», — дейилади ИИББ ахборотида.
