Эрдўған Трамп билан суҳбатдан кейин Суриядаги янги амалиётни кейинга қолдирди

Туркия президенти Ражаб Тоййиб Эрдўған АҚШ президенти Дональд Трамп билан яқинда ўтган суҳбатдан кейин Анқара Сурияда Фрот дарёсидан шарқда янги амалиётни бошлашни кейинроққа қолдиришга қарор қилганини маълум қилди.

“Ўтган ҳафта Фротдан шарқда ҳарбий амалиёт бошлашга ва у ҳақда эълон қилишга  қарор қилгандик. Бироқ АҚШ президенти Дональд Трамп билан телефон мулоқоти, дипломатик линиялар ва хавфсизлик хизматлари ўртасидаги алоқалар ва АҚШнинг Суриядан қўшинларни олиб чиқиши қарори бизнинг бироз кутиб туришимизга олиб келди”, деб айтган Эрдўған. 

Шу билан бирга Эрдўған гап амалиётнинг кейинроққа қолдирилиши ҳақида кетаётганини айтган.

Туркия президентининг таъкидлашича, Анқара Трамп билан суҳбатга қарамай, яқин ойларда Сурияда ИШИД гуруҳи, “Демократик иттифоқ” курд партияси отрядлари ва “Халқ мудофааси отрядлари”ни йўқ қилмоқчи. 

Эрдўған минтақавий хавфсизлик Туркия учун энг муҳим вазифа эканлигини, шу сабабли Анқара бу масалада Россия ва Эрон билан ўзаро ишлаётганини таъкидлаб ўтган.

19 декабрда Трамп АҚШ Сурияда ИШИДни тор-мор этганини, кейинроқ эса Оқ уй АҚШ Суриядан қўшинларни олиб чиқишни бошлашини маълум қилган. 

Бу орада турк ОАВ АҚШнинг Суриядаги қўшинлари курдларга қарши янги амалиёт бошлаш билан таҳдид қилган Туркия ва курд отрядлари ўртасида тўсиқ бўлганини таъкидлаб ўтган.