Бангладешда сайловлардаги тўқнашувларда 17 киши ҳалок бўлди

Бангладешнинг турли жойларида парламент сайловлари ўтаётган вақтда юз берган тўқнашувлар оқибатида 17 киши ҳалок бўлди. Бу ҳақда The Daily Star маҳаллий нашри маълум қилди.  

Ҳалок бўлганлар орасида «Халқ лигаси» ҳукмрон партиясининг 7 аъзоси ва “Бирлашган умумий фронт”дан 5 мухолиф бор.

Турли сиёсий оқимлар тарафдорлари ўртасидаги тўқнашувлар Читтагонг, Ражшахи, Динажпур, Рангамати, Богра ва бошқа бир қатор шаҳарларда юз берган. Полиция сайлов участкаларига ҳужум қилганларни тўхтатиш учун қурол қўллашига тўғри келган. 

ОАВ маълумотларига кўра, мухолифатдан бўлган 40 дан кўпроқ номзод кўплаб қоидабузарликлар ва маълумотларнинг сохталаштирилиши сабабли сайловларда иштирок этишдан воз кечган.

Бангладешда федерал парламент ва ҳудудий қонун чиқарувчи органларга депутатлар сайланди. Парламентдаги 300 ўрин учун 1848 номзод кураш олиб борган.  

Сайловларнинг якуний натижалари 31 декабрда эълон қилиниши кутилмоқда.