Италияда музли ёмғир 40 дан ортиқ автомобилнинг тўқнашувига сабаб бўлди

Италия шимолидаги тоғли йўлда 40 дан ортиқ автомобиль тўқнашуви юз берди, ЙТҲ натижасида 40 нафарга яқин киши жароҳатланди, деб хабар берди РИА Новости.

Хабар қилинишича, автомобиллар тўқнашувига музли ёмғир сабаб бўлган.  

"Тўқнашув 42-43 автомобиль иштирокида содир бўлган, 38-39 киши жароҳатланган. Уларнинг кўпчилиги енгил жароҳат олган", деб маълум қилди полиция вакили.

Унинг сўзларига кўра, бир киши оғир аҳволда касалхонага ётқизилган, тўрт киши ўртача даражада тан жароҳати олган.

"Бундай воқеа ўнлаб йиллардан бери содир бўлмаган бўлса керак. Тўғрисини айтсам, 34 йиллик фаолиятим давомида бундай йўл-транспорт ҳодисасини кўрмаганман", деди у.