Киев суди Украинанинг собиқ президенти Януковичга сиртдан 13 йиллик қамоқ жазоси тайинлади

Киевнинг Оболон туман суди Украинанинг собиқ президенти Виктор Януковичга давлатга хиёнат қилиш иши бўйича сиртдан 13 йиллик қамоқ жазоси тайинлади. 

Шу билан бирга, Янукович “одамлар ўлими ва бошқа оғир оқибатларга олиб келган, Украинанинг ҳудудий яхлитлиги ва дахлсизлигига тажовуз қилиш” айблови бўйича оқланган. Суд, шунингдек, Украина мудофаа қобилиятига зарар етказиш айбловини ҳам истисно қилган. 

Януковичнинг мулкини хатлаш ўз кучида қолган. Украинанинг собиқ президенти 98,5 минг гривен (3,5 минг доллар) миқдоридаги суд харажатларини қоплаб бериши керак. 

Жазони ўташ муддати Янукович ҳибсга олингандан бошлаб ҳисобланади. 

Януковичнинг адвокати Александр Байдик ҳукм ўқиб эшиттирилгандан кейин у бўйича арз қилинишини айтган. Бошқа бир ҳимояловчи Александр Горошинский суд бошидан ҳокимият босими остида ҳаракат қилганини, барча айбловлар исботларини мамлакатни ҳозирда бошқараётган кишилар тақдим қилганини айтган.