АҚШ ва Британияда автомобилларнинг каталитик конвертерлари оммавий равишда ўғирланмоқда

Охирги ярим йил ичида палладий танқислиги сабабли 50 фоиздан кўпроққа қимматлашди. Шу сабабли автомобилсозлик саноатида бензин двигателлари чиқарувчи зарарли чиқиндилар миқдорини камайтириш учун қўлланувчи бу металл 2002 йил январидан бери илк бор олтиндан қиммат тура бошлади. Бу эса АҚШ ва Британидяа машиналардаги каталитик конверторларнинг оммавий равишда ўғирланишига олиб келди. 

Палладий бозорида анчадан бери таклиф танқислиги кузатилмоқда ва кўплаб мутахассислар у яқин йилларда ҳам сақланиб қолишини прогноз қилишмоқда. Бу автомобилларга экологик талабларнинг қатъийлаштирилиши сабабли палладийга талаб ошгани билан боғланган. 

Дунёда палладий ишлаб чиқарувчи энг йирик компания “Норникель” прогнозларига кўра, металлнинг бозордаги танқислиги 2025 йилгача сақланиб қолади, жорий йилда эса 1,4 млн унцияга етади.

Каталитик конвертер автомобилнинг чиқинди газларни чиқариш тизимида ўрнатилувчи махсус қурилма бўлиб, чиқинди газлар заҳарлилиги даражасини камайтиришни таъминлайди. Унинг каталитик қатламида палладий қўлланади.