Honda Европадаги ягона заводини ёпадиган бўлди 

Honda япон автомобилсозлик компанияси глобал ишлаб чиқариш тармоғини қайта ташкиллаштириш доирасида Европадаги ягона заводини ёпадиган бўлди. Англиянинг Суиндонида жойлашган, йилига 150 минг автомобил йиғилувчи завод 2021 йилда ўз ишини тўхтатади. Компания 3500 ходимни қисқартиришига тўғри келади.

Honda раҳбариятининг маълум қилишича, ушбу қарор “автомобил саноатидаги мисли кўрилмаган ўзгаришлар” таъсири ва электр моделларни ишлаб чиқаришга ўтилиши сабабли қабул қилинган. Шу муносабат билан компания ўз фаолиятини юқори талаб кутилаётган ҳудудларда мужассамлаштиришни режалаштирмоқда. Заводнинг ёпилиши, шунингдек, Буюк Британиянинг Европа Иттифоқидан чиқиши билан боғлиқ бўлиши мумкин. Бу жараён  Бирлашган Қиролликда ишлаб чиқариладиган маҳсулотларга божларнинг ошишига олиб келади.   

Honda, шунингдек, Туркиядаги заводини ҳам ёпмоқчи. Бу ерда Civic модели ишлаб чиқарилади. Ушбу корхона ҳам 2021 йилда ўз ишини тўхтатади.

Honda Иккинчи жаҳон уруши вақтида самолётлар йиғилган Суиндондаги ишлаб чиқариш мажмуасини 1985 йилда сотиб олган. Бу ерда 4 йилдан кейин двигателлар, 1992 йилдан эса “Аккорд” модели ишлаб чиқарила бошланган. 2000-йиллар бошидан Суиндонда ишлаб чиқарилган автомобиллар Японияга экспорт қилина бошланган. Англияда Honda шунингдек Jazz ва CR-V моделларини ишлаб чиқарган.