Нидерландия Эрондан элчисини чақиртириб олди

Нидерландия Эрон ҳукумати мамлакатдан Нидерландия элчихонасининг 2 ходимини чиқартириб юборгандан кейин Эрондаги ўз элчисини маслаҳатлашувлар учун чақиртириб олди. Бу ҳақда Нидерландия ташқи ишлар вазири Стеф Блок маълум қилди. 

Унинг айтишича, нидерландиялик дипломатлар Эрондан 3 март куни чиқартириб юборилган.

Нидерландия ташқи ишлар вазирлиги маълумотларига кўра, Эрон 20 февралда Нидерландия элчисини Теҳрондаги элчихонанинг икки ходими персона нон грата деб эълон қилинишидан хабардор қилган. Бу қарор Нидерландия томонидан 2018 йил июнда икки эронлик дипломатнинг чиқартириб юборилишига жавоб бўлган. Бунга эса Эрон 2015 йилда Алмерда ва 2017 йилда Гаагада келиб чиқиши эронлик бўлган икки голландга суиқасд қилинишига алоқадор бўлиши мумкинлиги сабаб бўлган.   

Эроннинг Гаагадаги элчиси Нидерландия ташқи ишлар вазирлигига тушунтириш бериш учун чақиртирилган. Суҳбат чоғида Нидерландия “голланд дипломатларининг чиқартириб юборилиши икки томонлама муносабатларга салбий таъсир қилиши ва номақбуллигини” таъкидлаб ўтган. Бироқ шунга қарамай дипломатларни чиқартириб юборишга қарор қилинган.