ОАВ: Нью-Йорк прокуратураси Трампнинг қурилиш лойиҳалари устидан текширув бошлади

Нью-Йорк бош прокуратураси Deutsche Bank ва Investors Bank банкларига Trump Organization компаниясининг тўртта йирик лойиҳаси молиялаштирилиши тўғрисидаги ҳужжатларни тақдим этишини сўраб мурожаат қилди. Бу ҳақда ўз манбаларига таяниб New York Times хабар бермоқда.

Газетанинг ёзишича, прокуратура АҚШ президентининг собиқ адвокати Майкл Коэн конгрессга кўрсатма берганидан сўнг текширув бошлаган. У Дональд Трамп ўз молиявий ҳисоботларида активлари – жумладан, Deutsche Bank банкига тақдим этган лойиҳалари қийматини ошириб кўрсатганини билдирган. Адвокат шунингдек, конгрессга ушбу ҳужжатларнинг лойиҳасини кўрсатган.

Нашрнинг хабар беришича, прокуратура Вашингтондаги Trump International Hotel, Флорида штатидаги Trump National Doral меҳмонхоналари, Чикагодаги Трамп минорасига оид кредитлар, ипотека ва бошқа молиявий ўтказмаларга қизиқмоқда. Шу билан бирга ҳуқуқни муҳофаза қилиш органларини Трампнинг «Баффало Биллс» футбол жамоасини сотиб олишга бўлган муваффақиятсиз уриниши ҳам қизиқтирмоқда.

Трамп Deutsche Bank’нинг АҚШдаги бўлими ва Нью-Жерсидаги Investors Bank билан ишлаган, деб ёзади нашр. Deutsche Bank ва Investors Bank ушбу хабарни изоҳлашдан бош тортган.