Венесуэлада электр таъминоти тўлиқ тикланди

Венесуэла алоқа ва ахборот вазири Хорхе Родригес мамлакатда электр таъминотидаги  муаммолардан кейин 13 март куни электр энергия узатиш тўлиқ тикланганини маълум қилди. 

“Бугун электр энергия узатиш 100 фоизга тикланди”, деб маълум қилган Родригес телевидение орқали. Шу билан бирга у бир қатор жойларда трансформаторлар портлагани сабабли ҳамон муаммолар борлигини тан олган.

Шунингдек, мамлакат раҳбарияти электр таъминотидаги инқироз сабабли 14 мартни ўқувчилар учун қаторасига 7-дам олиш куни деб эълон қилди. 

“Президент Николас Мадуро 14 март куни барча меҳнат фаолияти: давлат, хусусий, тижорат, ишлаб чиқариш бутун мамлакат бўйлаб тикланиши ҳақидаги қарорни қабул қилди. Мактабдаги машғулотлар эса яна 24 соатга тўхтатилди”, деб қўшимча қилган вазир.

Венесуэлада 7 март куни мамлакатдаги энг йирик ГЭСдаги авария сабабли энергетик коллапс юз берди. Венесуэла миллий электр энергия корпорацияси Corpoelec аварияни қўпорувчилик ва мамлакатга қарши энергетик урушнинг бир қисми деб атаган.