Бош прокуратура: Ўзбекистонда 100 минг аҳолига ўртача 13,3та жиноят тўғри келмоқда

Бош прокуратура томонидан Ички ишлар вазирлиги билан ҳамкорликда жиноятларни фош этиш бўйича комплекс чоралар кўрилди, деб хабар бермоқда маҳкама матбуот хизмати. 

Хусусан:

жойларда амалий ёрдам кўрсатиш учун Бош прокуратура ва ИИВ ходимлари таркибидан доимий фаолият юритадиган ишчи гуруҳлар ташкил этилди;

жиноятларни тезкор фош этиш бўйича ҳудудларда тажрибали ходимлар (экспертлар, криминалистлар, терговчилар)дан иборат ишчи гуруҳлар тузилди;

жорий йилнинг 1 мартидан электрон жиноий-ҳуқуқий статистика оид ягона ахборот тизими ишга туширилди;

онлайн режимда назорат имконини берувчи фош этилмаган жиноятларнинг ягона электрон базаси яратилди;

ҳуқуқбузарликлар профилактикаси билан шуғулланувчи органларнинг ҳамкорлигини таъминловчи дастурий илова яратилди ҳамда Навоий вилоятида синов тариқасида ишга туширилди;

қидирувдаги шахслар тергов ва суд органларига ихтиёрий келган тақдирда, эҳтиёт чораси ўзгартирилиши ҳақида қидирилаётган шахсларнинг қариндошларига тушунтиришлар берилмоқда.

Кўрилган чора-тадбирлар натижасида, жорий йилнинг икки ойида:

содир этилган жиноятлар сонининг кескин камайишига эришилди, хусусан бу кўрсаткич 4.246 та жиноятни ташкил этиб, 2018 йилнинг шу даврига (5.811) нисбатан 27%га камайган;

Ўзбекистонда 100 минг аҳолига ўртача 13,3 та жиноят тўғри келмоқда (бу кўрсаткич Тожикистонда – 40, Озарбойжон – 44, Молдова – 150, Россия – 225, Қозоғистон – 240ни ташкил этади), жиноятчилик даражаси ўтган йилга (18,1) нисбатан 26,5%га камайган;

жиноят содир этганлиги учун қидирилаётган шахсларнинг 277 нафари ушланди, 346 та жиноят иши судларга юборилди;

фош этилмаган жиноятлар сони (87) ўтган йил билан (144) солиштирганда 40%га камайган;

содир этилган барча қотиллик, босқинчилик, оғир тан жароҳат етказиш, номусга тегиш жиноятлари тўлақонли фош этилди;

жиноят содир этган 93 нафар шахснинг хорижий давлатлардан экстрадицияси таъминланган.