АҚШнинг Аляска штати федерал судьяси АҚШ президенти Дональд Трампнинг Арктика ва Атлантика океанида нефть ва газ қудуқларини бурғилашни тақиқловчи қарорни бекор қилиш ҳақидаги фармонини ноқонуний деб эълон қилди. Бу ҳақда The Washington Post нашри хабар берди.
Судья Шэрон Глисон президентда нефть ва газ лизинги миллий дастуридан ҳудудларни истисно қилиш ҳуқуқи борлигини, бироқ конгрессгина унга янги ҳудудлар кирита олишини таъкидлаб ўтган.
АҚШнинг аввалги президенти Барак Обама ўзининг президентлик муддати сўнгида умумий майдони 518 минг квадрат километрни ташкил қилувчи Атлантика океанининг бир қатор ҳудудлари ва Аляска соҳилбўйида нефть ва газ қудуқларини бурғилашни тақиқлаган. Трамп бу тақиқловни 2017 йил апрелида бекор қилиб, Чукотка ва Бофорт денгизларидаги шельфда қазиш ишларини олиб боришга рухсат берган.
