Вадим Абрамов: «Футболчиларим маош олишни бошлашса, бундан ҳам яхшироқ ўйнашади»

Суперлига 5-туридан ўрин олган ОКМК - «Бунёдкор» (0:1) ўйинидан сўнг ҳар икки жамоа мураббийлари иштирокида матбуот анжумани ўтказилди. Анжуманнинг биринчи қисмида «Бунёдкор» мураббийи Вадим Абрамов журналистларнинг саволларига жавоб берди.

«Ўртоқлик ўйинида ОКМКни мағлуб этганимиз? У ўйин билан бугунги баҳсни солиштириб бўлмайди, чунки у ўртоқлик ўйини бўлганди. Ўртоқлик ўйинига жиддий эътибор бериш керак эмас.

Ёмғир ўйинга халақит берди деб ўйламайман, чунки футболчилар бунақа ҳолатларга ўрганишган. Бугун ўзимиз ҳолатимизни қийинлаштириб юбордик. Гол ургандан сўнг яна ҳужум қилишимиз керак эди, лекин биз ҳисобни ушлашга зўр бердик. Бундай бўлмаслиги керак эди.

Ғалаба қозониб, очколар тўплашда давом этаётганимиздан хурсандман ва умид қиламан, бу бизнинг охирги очкомиз бўлмайди. Биз ҳали ўз уйимизда ўйнаганимиз йўқ. Кейинги турларда «Бухоро», «Қизилқум» билан меҳмонда ўйнаймиз. Футболчиларим маош олишни бошлашса, бундан ҳам яхшироқ ўйнашади»,- деб футболчининг сўзларини келтиради Tribuna.uz мухбири.