Мисрда Ас-Сисийга 2030 йилгача президент бўлиб қолишга имкон берувчи тузатмалар қўллаб-қувватланди 

Мисрда ўтган референдумда сайловчилар кўпчилик овоз билан мамлакат конституциясига тузатмалар киритилишини қўллаб-қувватлашди. Бу тузатмаларда амалдаги давлат раҳбари Абдулфаттоҳ ас-Сисийнинг президентлик муддатининг узайтирилиши кўзда тутилган. Бу ҳақда сайлов комиссияси раиси Лёшин Иброҳим маълум қилди.   

Тузатмалар учун референдумда иштирок этган сайловчиларнинг 88 фоизи овоз берган. 

Шу тариқа Мисрда президентлик муддати 4 йилдан 6 йилгача узайтирилди. Бундан ташқари, президентга учинчи муддатга сайланиш ҳуқуқини берувчи модда киритилди. Энди 2018 йилда 2-муддатга сайланган ас-Сисийнинг ваколатлари 6 йилдан кейин, яъни 2024 йилда тугайди ва у яна бир муддатга сайланиб, 2030 йилгача президент бўлиб қолиши мумкин.   

Ас-Сисий Мисрда ҳозирда тақиқланган “Мусулмон биродарлар” вакили Муҳаммад Мурсий ҳокимиятдан четлатилгандан бир йил ўтиб 2014 йилда президент этиб сайланган. 2018 йил у 2-муддатга қайта сайланган.