Таиланд савдо вазирлиги ва миллий парклар департаментининг қўшма буйруғи билан мамлакатдан филларни ҳамда "филлар билан боғлиқ маҳсулотларни" экспорт қилишга рухсат берилди. Бу ҳақда "Тхаи Рат" газетаси хабар қилди.
Буйруққа мувофиқ, илмий ва дипломатик мақсадлар учун филларни ҳамда "филлар билан боғлиқ маҳсулотларнинг" чекланган экспортига рухсат берилади. Рухсат мамлакат парламентига кўриб чиқиш учун тақдим этилган филлар экспорти тўғрисидаги қонун қабул қилингунича амал қилади.
Таиландда 2009 йилда филларни экспорт қилишга тақиқ қўйилганди.
XX аср бошларида Таиландда 100 мингдан ортиқ хонаки фил бўлган. Ҳозирда мамлакат киносаноати, ўрмон саноати ва бошқа соҳаларда 3,5 мингга яқин хонаки филлардан фойдаланилади. Ёввойи филлар сони эса мингтадан ошмайди.
