53 қурбонга 53 та умрбод қамоқ жазоси: Туркиядаги терактлар ташкилотчисига жазо ҳукми чиқарилди

Туркиянинг  Хатай вилоятидаги Райҳонли шаҳрида содир этилган теракт ташкилотчиларидан бири Юсуф Нозикка қатъий тартибдаги колонияда 53 та умрбод қамоқ жазоси берилди. Бундай ҳукмни Анқара шаҳрининг ўта оғир ишлар бўйича суди чиқарган.

Туркия миллий разведка ташкилоти ходимлари Нозикни Сурияда 2018 йил сентябрда ушлаш бўйича операция ўтказишган. У сўроқ вақтида Сурия махсус хизматлари билан яқиндан ҳамкорлик қилгани ва теракт ижрочилари ҳаракатларини бошқариб турганини тан олган. 

Террорчининг айтишича, унинг буйруғи билан Суриядан Туркияга иккита машинада портловчи модда етказилган. Нозик терактни “дўстлари” билан режалаштирганини қўшимча қилган.

2013 йил 11 май куни Райҳонли шаҳридаги почта бўлими биноси олдида теракт содир этилган. Теракт оқибатида 53 киши ҳалок бўлганди.

2018 йил 23 февралда ушбу иш бўйича судланган 33 кишидан 9 нафари умрбод, яна 13 киши 10 йилдан 15 йилгача қамоқ жазоси олган.

8 террорчи, жумладан Юсуф Нозик халқаро қидирувга берилган.