АҚШ президенти Дональд Трамп Вашингтон Яқин Шарққа кўп сонли қўшинни жўнатишга тайёрлиги ҳақидаги хабарга изоҳ берди.
Аввалроқ The New York Times нашри Пентагон Эронга қаршилик кўрсатиш учун Яқин Шарққа 120 минг ҳарбий юбориш режасини тайёрлаганини маълум қилган. Нашр маълумотларига кўра, бу стратегияни Трампнинг миллий хавфсизлик бўйича маслаҳатчиси Жон Болтон бошчилигидаги кескин чоралар тарафдорлари – “қирғийлар” қўллаб-қувватлашган. Бироқ режа Эронга бостириб киришни кўзда тутмайди.
Трампнинг айтишича, бу ёлғон хабар. У, шунингдек, бундай қадамга бориши мумкинлигини, лекин ҳозирча буни режалаштирмаганини қўшимча қилган.
“Фикримча, бу fake news (ёлғон хабар), тушунарлими? Буни қилган бўлармидим? Шубҳасиз. Бироқ биз буни режалаштирмаганмиз. Умид қиламанки, режалаштиришимизга тўғри келмайди ҳам. Агар буни қилсак ҳам, биз кўпроқ қўшин жўнатамиз”, деб айтган Трамп журналистларга.
