АҚШ Кубага нисбатан санкцион босимни кучайтирмоқда

АҚШ Куба иқтисодиётининг муҳим қисми ҳисобланган бешта йирик давлат компаниясига қарши янги санкциялар жорий қилди. Вашингтон ушбу чоралар орқали Ҳаванадаги ҳукумат элитаси ва ҳарбий тузилмаларнинг молиявий манбаларига зарба беришни мақсад қилганини билдирди.

Фото: picture alliance

Reuters агентлигининг хабар беришича, АҚШ давлат котиби Марко Рубио янги чекловлар Кубанинг бешта давлат компаниясига нисбатан қўлланаётганини маълум қилди. Уларнинг учтаси мамлакат Қуролли кучлари тасарруфидаги Grupo de Administración Empresarial S.A. (GAESA) бизнес-конгломерати билан боғлиқ.

Турли баҳолашларга кўра, GAESA Куба ялпи ички маҳсулотининг қарийб 40 фоизини назорат қилади. Агентлик маълумотларига кўра, холдинг 2024 йил ҳолатига 14,5 миллиард доллар миқдорида ликвид активларга эга бўлган.

Санкциялар рўйхатига киритилган компаниялар ташқи савдо, импорт-экспорт операциялари, хорижий инвестициялар, молиявий хизматлар ҳамда пўлат ишлаб чиқариш соҳаларида фаолият юритади. Шунингдек, АҚШ Куба Миллий хавфсизлик кенгаши раҳбари ва Раул Кастронинг ўғли Алехандро Кастронинг турмуш ўртоғига нисбатан ҳам чекловлар жорий қилди.

Марко Рубионинг таъкидлашича, Куба ҳукумати GAESA орқали мамлакат иқтисодиётининг муҳим қисмини назорат қилиб, ушбу маблағлардан репрессиялар, кузатув фаолияти ва АҚШ манфаатларига қарши ҳаракатларни молиялаштириш учун фойдаланмоқда.

Куба ташқи ишлар вазири Бруно Родригес эса янги санкцияларни «шафқатсиз агрессия» ва «жамоавий жазолаш сиёсати» деб баҳолади. У Марко Рубиони Кубага нисбатан адолатсиз ва ҳақиқатга тўғри келмайдиган айбловлар қўяётганликда танқид қилди.

Шу билан бирга, АҚШ Олий суди Америка компанияларининг Фидел Кастро даврида миллийлаштирилган мулклари бўйича товон талаб қилиб судга мурожаат қилиш ҳуқуқини тасдиқлади.

Хусусан, энергетика гиганти Exxon компанияси Кубада давлат тасарруфига ўтказилган нефтни қайта ишлаш заводи, нефт терминаллари ва 100 дан ортиқ ёнилғи қуйиш шохобчалари бўйича даъво киритиш имкониятини қўлга киритди. The Wall Street Journal маълумотига кўра, эҳтимолий компенсация миқдори 1 миллиард долларгача етиши мумкин.

Таҳлилчилар фикрича, Вашингтоннинг бу қадамлари АҚШ ва Куба ўртасидаги муносабатларни янада таранглаштириши, шу билан бирга Доналд Трамп маъмуриятининг Ҳаванага нисбатан қатъий сиёсатини кучайтириши мумкин.