Трамп Ким Чен Индан «илиқ» мактуб олганини маълум қилди  

АҚШ президенти Дональд Трамп Шимолий Корея етакчиси Ким Чен Индан “илиқ” мактуб олганини маълум қилди. Бу ҳақда 11 июнда Reuters ахборот агентлиги хабар берди. 

Трамп журналистлар олдидаги чиқиши вақтида яқин орада Ким Чен Ин билан учрашув бўлиб ўтиши мумкинлигини айтган, бироқ ҳеч қандай тафсилотлар келтирмаган.

АҚШ президенти Ким Чен Ин ҳанузгача ўз ваъдасида туриб, узоқ масофаларга мўлжалланган баллистик ракета ва ер ости ядро синовларини ўтказмаётганини таъкидлаб ўтган. 

“У менга берган ваъдаси устидан чиқди. Бу жуда муҳимдир”, деб айтган Трамп.

Аввалроқ Трампнинг миллий хавфсизлик бўйича ёрдамчиси Жон Болтон Вашингтон Шимолий Корея етакчиси билан исталган вақтда саммит ўтказишга тайёрлигини маълум қилганди.

АҚШ ва Шимолий Корея етакчилари ўртасидаги илк тарихий учрашув 2018 йил июнида Сингапурда бўлиб ўтган. Музокаралар якунларига кўра Пхеньян ядровийсизланишга рози бўлган, Вашингтон эса бунинг эвазига хавфсизлик кафолатини берадиган келишувга эришилган.

Трамп ва Ким Чен Иннинг иккинчи учрашуви февраль охирида Ханойда бўлиб ўтган. Бироқ бу сафар томонлар ҳеч қандай келишувларга эриша олишмаган.