Нигерияда 60 дан кўпроқ одам жиноятчилар ҳужумлари қурбонига айланди

Нигериянинг марказий қисмида қуролланган жиноятчиларнинг бир қатор ҳужумлари оқибатида камида 62 киши ҳалок бўлди. Бу ҳақда Нигер штатидан сенаторга иқтибос келтирган ҳолда Nation маҳаллий нашри хабар қилди.

Таъкидланишича, ҳужумлар 9 июнь куни Широро туманида бошланган. Жиноятчилар 8 та қишлоққа ҳужум қилган. Ҳужумлар оқибатида мингдан кўпроқ одам ички кўчирилган шахслар учун мўлжалланган лагерларда жон сақлашга мажбур бўлган.

“Мен президент Муҳаммаду Бухорийдан ҳарбийлар бу ерга жиноятчиларни тўхтатиш учун келишларига буйруқ беришини сўрайман”, деб айтган сенатор. У, шунингдек, ҳарбийларга ҳам мурожаат қилган.

Бу орада полиция вакили Муҳаммад Абубакар ҳужумлар содир этилганини тасдиқлаган, бироқ фақат 12 киши ҳалок бўлганини маълум қилган. У қишлоқларга вазиятни баҳолаш учун полиция ходимлари жўнатилганини қўшимча қилган.