Туркия Париждаги авиашоуда ўзи ишлаб чиқараётган бешинчи авлод қирувчи самолётини намойиш этади

Туркиянинг авиация-космик техникасини ишлаб чиқарувчи Turkish Aerospace Industry (TAI) компанияси 53-Париж авиашоусида илк бор ўзи ишлаб чиқараётган бешинчи авлод қирувчи самолётини намойиш этади. Авиашоу 17-23 июнь кунлари Париж яқинидаги Ле-Бурже шаҳарчасида бўлиб ўтади.

"Париж авиашоуси давомида TF [Turkish Fighter Project] дастури доирасида ишлаб чиқарилаётган бешинчи авлод қирувчи самолётининг тўлиқ ҳажмдаги макети илк бор намойиш этилади", - деб хабар берди компания матбуот хизмати.

Компаниядаги манбанинг сўзларига кўра, ҳозирда TF-X (Turkish Fighter - X) номини олган бешинчи авлод қирувчиси лойиҳаси самолётга бўлган талабларни аниқлаш жараёнида.

"Айни пайтда TAI ишлаб чиқарилаётган намунанинг парвоз-техник хусусиятларини аниқламоқда", - деди у.

Компаниянинг маълум қилишича, Ле-Буржедаги авиашоуда шунингдек, Туркиянинг илк T129 ATAK жанговар вертолёти парвози намойиш этилади.