Туркия С-400 сабабли санкция киритиладиган бўлса АҚШга жавоб қайтаришга тайёрлигини билдирди

Туркия ташқи ишлар вазири Мавлут Човушўғлу Россиянинг С-400 зенит ракета мажмуаларини сотиб олиши сабабли санкциялар жорий этиладиган бўлса Анқара Вашингтонга жавоб қайтаришга тайёрлигини билдирди.  

"Агарда АҚШ салбий чоралар қўллашни бошласа, бизда ҳам жавоб қадамлари бор. Америка қатор қарорларни қабул қилди, биз индамай қараб турмоқчи эмасмиз. Бизга нисбатан салбий муносабат қилинса, биз ҳам худди шундай жавоб қайтарамиз", - деб таъкидлади вазир.

Човушўғлу Туркия С-400 сотиб олиш масаласида қатъий эканлигини ва сотиб олишдан воз кечмаслигини айтди.

"С-400 масаласида қатъий қарорга келганмиз ва ортга қайтмоқчи эмасмиз. Биз мана шундай тизимга бўлган эҳтиёжимизни қондиришимиз лозим эди ва буни Россия билан амалга оширдик", - деб таъкидлади у.

АҚШ Туркиянинг С-400’ларни сотиб олишига қарши чиқмоқда ва Анқарага санкциялар солиш билан таҳдид қилмоқда. Туркия ўз навбатида мажмуалар АҚШга хавф солмаслигини ва Анқара уларни сотиб олишдан воз кечмаслигини айтиб келади.

Шартномага кўра, Россия Туркияга тўртта С-400 дивизионини етказиб беради. Шартнома қиймати 2,5 млрд долларни ташкил қилади.