Си Цзиньпин ва Ким Чен Ин «ёрқин келажак» тўғрисида келишиб олишди

Фото: Ju Peng/Xinhua via REUTERS

ХХР раиси Си Цзиньпин ва КХДР давлат кенгаши раиси Ким Чен Ин Пхеньянда бўлиб ўтган музокаралар якунига кўра икки давлат ўртасидаги муносабатларнинг "ёрқин келажаги" учун ҳамкорлик қилиш тўғрисида келишиб олишди. Бу ҳақда "Синьхуа" агентлиги хабар бермоқда.

Си Цзиньпин 20 июнь куни ҳукумат делегацияси ҳамроҳлигида махсус рейс билан Пхеньянга келди.

Бу Си Цзиньпиннинг давлат раҳбари сифатида Шимолий Кореяга биринчи ташрифи бўлди.

Аввалроқ КХДР давлат кенгаши раиси Ким Чен Ин "ХХР билан дўстона алоқаларни мустаҳкамлаш ва янада юқори даражага олиб чиқиш" ниятида эканлигини маълум қилганди.