Эрдўған: Туркия ўзининг Идлибдаги ҳарбийларини ҳимоя қилиш учун барча зарур чораларни ишга солади

Агарда зарурат туғилса, Туркия ҳукумати Суриянинг Идлибидаги ўз ҳарбийларини ҳимоя қилади. Бу ҳақда Туркия президенти Ражаб Таййип Эрдўған Россия президенти Владимир Путин билан бўлиб ўтган музокаралари якунидаги матбуот анжуманида маълум қилди.

"Бу ерда [Идлибда] вазият шунчалик кескинлашдики, айни пайтда бизнинг ҳарбийларимиз хавф остида қолишган. Биз бунинг давом этишини истамаймиз. Бу ерда зарурият туғилганда барча зарур чоралар ўз вақтида амалга оширилади", - деди у.

Эрдўған шунингдек, Идлибда Сурия ҳукумати армиясининг фуқаролик объектларини ҳам бомбардимон қилаётгани Сочида имзоланган меморандум бажарилишини қийинлаштираётганини айтди.

Эслатиб ўтамиз, 19 август куни туркларнинг зирҳли техникалари Сурия шимолидаги Идлиб вилоятида жойлашган Хан-Шейхун шаҳри томон юриш бошлагани хабар қилинганди. 

2 август куни Қозоғистон пойтахти Нур-Султон шаҳрида Сурия масаласида ўтказилган музокаралардан кейин «ўт очишни тўхтатиш режими» кучга кирганди. Сурия араб республикаси қуролли кучлари қўмондонлиги ҳарбий ҳаракатлар фақатгина Туркия томони 2018 йил сентябрида Сочидаги музокаралар натижасида эришилган Россия-Туркия келишуви шартларини бажарган тақдирда тўхтатилишини маълум қилган. Бу келишувнинг асосий пункти оғир ва ўрта оғирликдаги ҳарбий қуролларни Идлибдаги ҳарбийсизлаштирилган ҳудуддан 20 километр узоққа олиб кетиш ҳисобланади.