Тадбиркорнинг 1 млрд. сўмдан зиёд ҳақлари ундириб берилди

МИБ маълумотига кўра, 6 август куни Мажбурий ижро бюроси Андижон вилояти Олтинкўл туман бўлимига “Parvoz Xumo Ravnaq Trans” МЧЖ фойдасига қарздор корхонадан қарз ундириш билан боғлиқ Ғиждувон туманлараро иқтисодий судининг 4 августдаги ижро варақаси келиб тушган.

МИБ мазкур ижро ҳужжати бўйича ўзининг қонуний ҳаракатларини амалга оширган.

Қарздор ҳисоб рақамига 2019 йил 20 августда Ўзбекистон Республикаси «Суд ҳужжатлари ва бошқа органлар ҳужжатларини ижро этиш тўғрисида»ги Қонунига кўра инкасса топшириқномаси ҳамда ундирувни қарздорнинг ҳисоб рақамларидаги пул маблағларига қаратиш тўғрисида қарор қабул қилиниб, банк муассасасига юборган.

Қарздор корхона директори ёзма аризасига кўра қарзни тўлаш учун ижро ҳаракатлари 10 кун муддатга кечиктирилган.

Жорий йил 4 сентябрь куни ижро ҳужжатларида ундирилиши кўрсатилган жами 1 млрд. 484 млн. 67 минг сўм маблағ ундирувчи “Parvoz Xumo Ravnaq Trans” МЧЖга тўлиқ ундирилиши таъминланган.