Цай Лин: Ўзбекистон Хитойга пахта етказиб бериш бўйича олтинчи, газ экспорти бўйича саккизинчи ўриндаги ҳамкори 

Хитой Ўзбекистоннинг энг катта савдо ҳамкорларидан биридир. Ўз навбатида, Ўзбекистон ҳам Хитой учун катта аҳамиятга эга. Мамлакат пахта етказиб бериш бўйича Хитойнинг 6-ўриндаги ресурси бўлса, газ экспорти бўйича 8-йирик ҳамкоридир. 

Бу ҳақда Бутунхитой Халқ вакиллари йиғини молиявий-иқтисодий қўмитаси аъзоси Цай Лин «Қишлоқ хўжалигини ислоҳ қилишда Хитой Халқ Республикаси тажрибаси ва уни Ўзбекистон Республикасида қўллаш имконияти» мавзуида ўтказилган халқаро анжуманда маълумот берди. 

«Хитой ва Ўзбекистон ўртасида 1992 йилда дипломатик муносабатлар ўрнатилган бўлса, 1996 йилда солиққа оид ҳужжат имзоланди. 2011 йилда эса инвестиция ҳимояси тўғрисида битимга эришилди. Шубҳасиз, булар давлатлар ўртасидаги ҳамкорликнинг ривожланишига ёрдам беради», деб таъкидлади Цай Лин.