Тадбиркорлар объектларини ёнғин-профилактика кўригидан ўтказиш тартиби ўзгаради

Норматив-ҳуқуқий ҳужжатлар лойиҳалари муҳокамаси порталида “Тадбиркорлик субъектларига тегишли бўлган объектларни ёнғин-профилактика кўригидан ўтказиш тартиби тўғрисидаги низомга ўзгартириш ва қўшимчалар киритиш ҳақида”ги ҳужжат лойиҳаси эълон қилинди.

Низом 1-бандининг (Низомда қуйидаги асосий тушунчалар қўлланилади) учинчи хатбошисидаги (давлат ёнғин назорати органлари — Ўзбекистон Республикаси Ички ишлар вазирлигининг Давлат ёнғин хавфсизлиги хизмати, Транспортдаги ички ишлар бошқармаси ва Жазони ижро этиш бош бошқармаси ҳамда уларнинг қуйи бўлинмалари) “Ички ишлар вазирлигининг Давлат ёнғин хавфсизлиги хизмати, Транспортдаги ички ишлар бошқармаси ва Жазони ижро этиш бош бошқармаси ҳамда уларнинг қуйи” деган сўзлар “Фавқулодда вазиятлар вазирлигининг ёнғин назоратини амалга ошириш ваколатига эга бўлган тегишли” деган сўзлар билан алмаштирилади.

4-банддаги (Ёнғин-профилактика кўригини ўтказиш учун Назорат қилувчи органлар фаолиятини мувофиқлаштирувчи Республика кенгаши (вилоятлар комиссиялари) билан келишиш талаб этилмайди. Ёнғин-профилактика кўригини ўтказиш жараёнида текширишларни рўйхатга олиш китоби тўлдирилмайди, давлат ёнғин назорати органларининг мансабдор шахсларига тадбиркорлик субъектларда текшириш ўтказиш ҳуқуқини берувчи махсус гувоҳнома талаб этилмайди) “Назорат қилувчи органлар фаолиятини мувофиқлаштирувчи Республика кенгаши (вилоятлар комиссиялари)” деган сўзлар “Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакили» деган сўзлар билан алмаштирилади.

6-банд (Ёнғин-профилактика кўригини ўтказиш санаси, кўрик ўтказиладиган объектлар тадбиркорлик субъектига бир ой олдин мазкур Низомнинг 2-иловасига мувофиқ шаклдаги билдиришномани почта орқали буюртма хат билан юбориш ёки тилхат билан топшириш орқали маълум қилинади) қуйидаги таҳрирда баён этилади:

“6. Ёнғин-профилактика кўриги ўтказилиши тўғрисида тадбиркорлик субъектига жойнинг ўзида маълум қилинади”.

7-банддаги (Ишлаб чиқариш (хизмат кўрсатиш, ишларни бажариш) зарурати билан боғлиқ бўлганда тадбиркорлик субъектининг аризасига асосан кўрикни ўтказиш муддати ўн кунга қолдирилади. Бунинг учун ариза кўрик ўтказиш санасидан ўн кун олдин тегишли давлат ёнғин назорати органига тақдим этилиши лозим) “ўтказиш санасидан ўн кун олдин тегишли давлат ёнғин назорати органига” деган сўзлар “ўтказишни бошлашдан олдин давлат ёнғин назорати органи мансабдор шахсига” деган сўзлар билан алмаштирилади.

9-банд (Умумхалқ байрамлари, халқаро ва республика спорт мусобақалари, форумлари, юқори мартабали чет эл делегацияларининг ташрифи билан боғлиқ тадбирларга тайёргарлик кўриш ва ташкил қилиш вақтида ушбу тадбирлар бўлиб ўтадиган объектда ва унинг 150 метр радиусида жойлашган объектларда қўшимча равишда ёнғин-профилактика кўриклари ўтказилиши мумкин) қуйидаги таҳрирда баён этилади:

“9. Умумхалқ ва диний байрамлари, халқаро ва республика спорт мусобақалари, форумлари, юқори мартабали чет эл делегацияларининг ташрифи билан боғлиқ ҳамда сиёсий тадбирларга тайёргарлик кўриш ва ташкил қилиш вақтида ушбу тадбирлар бўлиб ўтадиган объектда ва унинг 150 метр радиусида жойлашган объектларда, шунингдек болаларнинг ёзги дам олиш оромгоҳларида мавсум бошланишидан олдин ҳамда ҳар бир мавсумда бир маротаба қўшимча равишда ёнғин-профилактика кўриклари ўтказилиши мумкин.

Қўшимча равишда ёнғин-профилактика кўриги ўтказиш учун мазкур Низомнинг 3-иловасига мувофиқ расмийлаштирилган буйруқ асос бўлади.”.

11-банд (Биринчи гуруҳга тадбиркорлик субъектларига тегишли бўлган қуйидаги объектлар киради) қуйидаги мазмундаги ўн биринчи ва ўн иккинчи хатбошилар билан тўлдирилади:

“доимий тарзда юз нафар ва ундан кўп кишилар жойлашишига мўлжалланган даволаш ва соғломлаштириш муассасалари;

деҳқон (озиқ-овқат) бозорлари, ихтисослаштирилган ва буюм бозорлари (савдо комплекслари), савдо-кўнгилочар мажмуалари.”.

12-бандда (Иккинчи гуруҳга тадбиркорлик субъектларига тегишли бўлган қуйидаги объектлар киради):

учинчи хатбошидаги (доимий тарзда эллик нафар ва ундан кўп кишилар жойлашишига мўлжалланган даволаш ва соғломлаштириш муассасалари) “эллик нафар ва ундан кўп” деган сўзлар “эллик нафардан юз нафаргача” деган сўзлар билан алмаштирилади;

еттинчи хатбоши (деҳқон (озиқ-овқат) бозорлари, ихтисослаштирилган ва буюм бозорлари (савдо комплекслари) чиқариб ташланади;

саккизинчи (юз нафаргача ўринга мўлжалланган меҳмонхоналар, мотеллар, кемпинглар ва ётоқхоналар) ва тўққизинчи хатбошилар (суткасига минг тоннагача дон ва дон маҳсулотларини сақлаш ва қайта ишлаш ташкилотлари) тегишли равишда еттинчи ва саккизинчи хатбошилар деб ҳисобланади.

15-банд (Йилнинг 1 сентябрига қадар жойлардаги давлат ёнғин назорати органлари келгуси йилда ёнғин-профилактика кўриги ўтказиладиган тадбиркорлик субъектлари ва уларга тегишли объектлар рўйхатини шакллантиради ҳамда юқори турувчи давлат ёнғин назорати органига тасдиқлаш учун тақдим қилади) қуйидаги таҳрирда баён этилади:

“15. Маҳаллий давлат ёнғин назорати органларининг ҳар бир ходими ўзига бириктирилган секторда жойлашган тадбиркорлик субъектларига тегишли объектларнинг ёнғин хавфлилигига кўра гуруҳларга бўлинган рўйхатини шакллантиради.

Ушбу рўйхат асосида ёнғин-профилактика кўриклари ўтказиладиган объектлар давлат ёнғин назорати органи ходими томонидан белгиланган тартибда ойлик иш режа-жадвалига киритилади. Ёнғин-профилактика кўрикларини режалаштиришда мазкур Низомнинг 14-банди талаблари, бириктирилган секторда ўтказиладиган мавсумий тадбирлар ва содир бўлган ёнғинлар вазияти инобатга олиниши лозим.

Давлат ёнғин назорати органлари томонидан ўрнатилган тартибда текшириш ўтказилган тадбиркорлик субъектида йил давомида ёнғин-профилактика кўриги ўтказилмайди.”.

20-банд (Ёнғин-профилактика кўриги якунида давлат ёнғин назорати органи мансабдор шахси мазкур Низомнинг 4-иловасига мувофиқ тавсиялар маълумотномасини (бундан буён матнда маълумотнома деб юритилади) икки нусхада тузади ва бир нусхасини тадбиркорлик субъектига топширади) қуйидаги таҳрирдаги иккинчи хатбоши билан тўлдирилади:

“Ёнғин-профилактика кўриги ўтказилаётган тадбиркорлик субъектига тегишли объект жойлашган бинода (ҳудудида) бир нечта мулкдорлар ёки ижарачилар жойлашган бўлса, ушбу объектнинг ҳудудидаги бино ва хоналар кимга тегишлилиги ва ким томонидан фойдаланилаётганлигидан қатъий назар барчаси тўлиқ кўздан кечирилади. Якуни бўйича умумий маълумотнома тузилиб, унга барча аниқланган камчиликлар киритилади ва тегишли мулкдорлар (ижарачиларга) имзо орқали таништирилади.”.