Валентина Матвиенко Ўзбекистонга ташриф буюриши кутилмоқда  

Россия Федерация кенгаши спикери Валентина Матвиенко октябрь бошида Ўзбекистонга ташриф буюриши мумкин. Бу ҳақда Ўзбекистон Олий Мажлиси Сенати матбуот хизматида маълум қилинди. 

“Октябрнинг биринчи кунлари Россия Федерация кенгаши раиси Валентина Матвиенконинг Ўзбекистонга ташрифи кутилмоқда”, дейилган хабарда.

16 сентябрда Тошкентда Олий Мажлис Сенати раиси Танзила Норбоева ва Россия Давлат думаси спикери Вячеслав Володиннинг учрашуви бўлиб ўтди. 

Таъкидланишича, музокаралар давомида томонлар МДҲ парламентлараро ассамблеяси, Парламентлараро иттифоқ ва ЕХҲТ Парламент ассамблеяси доирасида ҳамкорликни янада ривожлантиришга тайёргарликни билдиришган. Володиннинг ташрифи Ўзбекистон ва Россия парламентлари ўртасидаги фаол мулоқотнинг мантиқий давоми ҳисобланиши таъкидлаб ўтилган.