Молдова собиқ президенти мамлакатдан 1 млрд евро олиб чиқиб кетилиши билан боғлиқ жиноятга алоқадорлигини рад этди

Мамлакат банкларидан 1 млрд евро олиб чиқиб кетилиши билан боғлиқ жиноят иши бўйича сўроқ қилинган Молдова собиқ президенти Пётр Лучинский бу жиноятга алоқадорлигини рад этди.

"Бу вазиятда кимгадир натижа эмас, шов-шув, кўпроқ жарангдор номлар кераклиги кўриниб турибди. Мен бу ишга ҳар қандай тарздаги алоқадорлигимни рад этаман", - деди у Ipn.md агентлигига берган баёнотида. Лучинский ўғирликка алоқадор банклардан кредит олмаганини, уларда ҳисобрақамлари бўлмаганини таъкидлади.

"Бўлиб ўтаётган барча воқеалардан бир нарсага ишонмоқдаман – бу менинг оиламга қарши кампания. Руминияда ўғлим Сергейни таъқиб қилишдан бошланди, кейин Кириллга ўтишди, энди эса менга. Улар номимни қора қилишмоқчи, лекин ҳақиқат тантана қилади", - деди Лучинский.

Собиқ президентнинг тўнғич ўғли Сергей Лучинский 2015 йилда румин бизнесменидан шантаж ва товламачилик йўли билан 1 млн еврони ўзлаштириб олганликда айбланиб Руминияда қўлга олинганди. Кейинроқ у уй қамоғига ўтказилган, сўнгра озодликка чиққанди. Кичик ўғли Кирилл эса ўтган йили пул ювишда айбланиб 5,5 йилга қамалган ва мол-мулки мусодара қилинганди.