«Эдегор дегани бормиди, қаерда ўша?». Мабодо «Реал»да қандайдир ёш юлдуз порлай бошласа ёки келажаги порлоқ дейилаётган бирор иқтидорга мадридликлар клуби катта пул сарфлашга тайёр экани эълон қилинса, мана шундай истеҳзолар пайдо бўлади.
Эсингизда бўлса, норвегиялик Мартин Эдегор 16 ёшида бутун Европанинг оғзига тушган, ёш футболчи барча топ-клубларда навбати билан шуғулланиб, улар ўртасида қандайдир маънода «тендер» ўтказганди. Якунда Эдегор «Реал»ни танлаб, мадридликлар билан шартнома имзолаши Флорентино Перес учун «пиар»га айланиб кетганди. Шу билан бирга, 16 ёшли футболчи учун йилига 2 миллион евродан ортиқ маош, шунингдек, футболчининг отасига клуб структурасидан иш кафолатланиши футбол жамоатчилигида шов-шув ҳам бўлди – янги Пеле топилдими?
Оловга Карло Анчелоттининг сўзлари ҳам мой сепди. У ўзининг «Сокин етакчилик» номли автобиографиясида тан олишича, «Эдегорнинг трансфери «Реал» ва унинг президенти Флорентино Перес учун шунчаки пиар эди ва клуб брендини Норвегияда ҳам машҳур қилишга қаратилганди. Мартин – жуда яхши ўйинчи, аммо ўшанда жамоага керак эмасди».
Аввалига, Эдегор асосий таркиб билан машғулотларда қатнашиб, асосан Зидан шуғуллантирадиган «Кастилья»да ўйнаб юрди. Норвегия терма жамоаси футболчиси Зизу билан тил топишиб кетмади, лекин бу «Реал»нинг асосий жамоасида дебют қилишга халақит бермади. 2015 йилда, Испания чемпионатининг сўнгги турида, «Хетафе» билан ўйинда Мартин захирадан майдонга тушди. У Криштиану Роналду ўрнини эгаллаганди.
Шу билан Мартинни «Реал»да кўрмадик. Ҳозир Эдегорни ҳатто «Реал»нинг мухлислари ҳам унута бошлаган, аҳён-аҳёнда ўтмишда умид қилинган, лекин порламаган юлдуз сифатида эслаб қўйишади. Аслида ҳам шунақами? Қуйида шу ҳақида баъзи маълумотларни келтирамиз. Баъзи мутахассисларнинг кузатишича, Эдегорнинг кейинги фаолияти шамолда учиб юрган баргни эмас, жуда чуқур ишлаб чиқилган режанинг бир бўлаги экан.
«Кастилья» даражаси Эдегорга торлик қилаётгани маълум эди, шунинг учун Мадрид клуби футболчи учун махсус дастур ишлаб чиқди. Режага кўра, футболчи бир қатор мавсумларни ижарада ўтказиб, катта футболга мослашиши керак эди. «Ҳеренвен» ва «Витесс»даги мавсумлар ортидан «Аякс» томонидан қизиқиш билдирилгани шуни кўрсатардики, «Стрёмсгодсет» тарбияланувчиси тўғри йўлда.
2020 йилнинг ёзигача «Реал Сосьедад»га ижара асосида ўтиш эса, тортнинг безаги бўлди, дейиш мумкин. Сан-Себастяндаги мавсум Эдегор учун сўнгги синов бўлиши ва шундан кейин у Мадридга қайтиши кутилмоқда. Ҳали эрта деб ўйлайсизми? Ундай эмас, сўнгги йилларда эришилган фантастик ўсишни пайқаш қийин эмас ва Эдегорнинг ўзи ҳам, ҳали унинг вақти келишига тўлиқ ишонмоқда.
