«Арсенал»да ҳам инқироз. Бунинг сабаблари нимада?

Мана шуларнинг ўзи ҳам йўқотишлар Микел Артетанинг мавсумини қанчалик оғирлаштираётганини кўрсатиб турибди. Шундай экан, испаниялик мутахассис ҳам жароҳатдагилар, хусусан, сардор Эдегорнинг қайтиши билан жамоанинг ўз формасига қайтиб олишидан умид қилаётган бўлса, ажаб эмас.

Эдегорга ўта боғланиб қолган жамоа

Дарҳақиқат, Мартиннинг йўқлиги клуб учун катта йўқотиш бўлди ва бу натижаларда акс этиб турибди. Сўнгги беллашувларда, хусусан, Миландаги баҳсда «Арсенал»га ҳужумдаги кескинлик етишмаяпти. Сўнгги баҳсда улар Ян Зоммер дарвозаси томон нақ 20 марта зарба беришди. 2006 йил ЦСКА Москвага қарши беллашувда 23 та гол билан якунланмаган зарба йўллаган «тўпчилар» учун бу иккинчи энг ёмон кўрсаткич бўлди.

Эдегорнинг жамоа ўйинига ижобий таъсири — инкор этиб бўлмайдиган факт. 2021 йил августидан бери лондонликларнинг ғалаба кўрсаткичи у майдонда бўлган учрашувларда ўртача 65,60 фоизни ташкил этган бўлса, норвегиялик яримҳимоячи жамоасига ёрдам бера олмаган баҳслардаги ғалабали ўйинлар улуши 47,10 фоиздир. У бор ўйинларда ўртача 2 та гол урилган бўлса, Мартинсиз ўйинларда ўртача 1,8 тадан тўп киритилган.

Яна такрорлаймиз, «Интер»га қарши баҳсда нимадир «Арсенал»ни хурсанд қилган бўлса, бу — Эдегорнинг атиги 5 дақиқага бўлса-да майдонга қайтгани. Унинг қайтиши, дарҳақиқат, катта воқелик ва катта эҳтимол билан уни «Челси»га қарши ўйинда ҳам майдонда кўрамиз. Артета ҳозирги муаммоли вазиятда эҳтиёт чоралари ҳақида ўйлаб ўтирмаса ҳам керак.

Ҳужумдаги муаммолар

Ҳақиқатан ҳам «Арсенал» «нерадзуррилар»га қарши беллашувда устунлик қилди ва буни статистика тасдиқлайди. Аммо уларнинг ҳужумларида ранг-баранглик етишмади. Беллашув мобайнида лондонликлар нақ 46 марта жарима майдонига кросс амалга оширишди. Бундан ташқари, 13 та бурчак зарбасининг айтарли ҳеч бири миланликлар дарвозасига жиддий хавф солмади. Кай Ҳаверцнинг ўйинида аниқ пасайиш бор. Сўнгги 6 учрашувда 1 та гол урган ҳужумчи мавсумнинг дастлабки 10 ўйинида 6 бор дарвозани ишғол қилганди.

Юқоридаги график орқали кўриб турибсизки, Кайнинг xG борасидаги кўрсаткичлари ҳам анча паст ва голлар сонидаги пасайиш ўз-ўзидан тушунарли: унга камроқ вазият яратиб берилмоқда. Буни Габриэл Мартинеллининг ўйинидаги қийин давр билан ҳам изоҳлаш мумкин. 2022/2023 йилги мавсумда 15 та гол ва 6 та ассист қайд этиб, чап қанотни ўз номига хатлаб олган бразилиялик вингер, айниқса, бу мавсумда ўз ўйинини топиб олишга қийналяпти. Мавсумнинг ҳозиргача бўлган қисмида у жами 2 та гол ва яна шунча ассист амалга оширди. Клубнинг ўз йўлига тушиб олиш масаласи Габининг сўнгги йиллардаги формасини қанча тез тиклай олишига ҳам боғлиқ.

Ҳужумчи керак эди(ми?)

«Арсенал»да нафақат майдонда, балки ташқарида ҳам катта воқеалар содир бўлмоқда. 5 йиллик фаолиятидан сўнг Эду клубни тарк этди. У Райс ва Эдегор каби бир қатар катта номларни «Эмирейтс»га олиб келди. Шу билан бирга, маоши фойдасидан баландроқ бўлган Пиер-Эмерик Обамеянг ва Месут Ўзил каби футболчиларни кетказди. Бироқ унинг ёзги кампанияда жамоага страйкер олиб кела олмагани муваффақиятсизлик эдими? Ҳозирги натижалар бу саволга «ҳа» деб жавоб бермоқда. Гарчи ўтган мавсум 91 та гол уриб, клуб рекордини янгилаган бўлса ҳам, «Арсенал»га яққол 9-рақам кераклиги рад этиб бўлмайдиган эҳтиёж эди. Ёз бўйи Александр Исак, Бенямин Шешко ва Виктор Гёкереш каби ҳужумчилар билан номи боғланган клуб якунда биргина Раҳим Стерлингни ижарага олиш билан чекланди. У эса ҳозиргача 8 та беллашувда майдонга тушиб, Лига Кубогида 1 та гол уришга муваффақ бўлди, холос. Демак, ёзда клуб ҳужумчи олиши шарт эди, мавсумни сақлаб қолиш учун ҳали ҳам кеч эмас.

Сафар ўйинларидаги муваффақиятсизликлар

Бир нарса аниқ: «Арсенал»нинг мавсум стартидаги тақвими доим қийин кўринади. Дастлабки 11 та турда «тўпчилар» «Астон Вилла», «Тоттенҳэм», «Манчестер Сити», «Нюкасл», «Челси» каби клубларнинг уйида, «Ливерпул» билан эса ўз майдонида ўйнаши кераклиги белгиланганди. Бу давр ичида «ПСЖ»ни уйида қабул қилиб, «Интер» майдонига сафар қилиш муаммони янада чигаллаштирди. Тақвимдан келиб чиққан ҳолда, «Арсенал» мавсумнинг ҳозирги пайтгача бўлган қисмини у қадар ёмон ўтказмаганини айтиш мумкин. Лекин «Нюкасл» ва «Борнмут»дан учралган мағлубиятлар уларнинг ёмон натижалари бўрттириб кўрсатилишига сабаб бўляпти. «Интер»дан учралган мағлубият билан «Арсенал» кетма-кет бешинчи бор ЕЧЛнинг меҳмондаги баҳсида ғалаба қозона олмаяпти ва уларнинг 4 тасида гол ҳам ура олмаган.

Энцо Мареска қўл остида қайта тикланаётган «Челси»ни енгиш билан Артета шогирдлари ўзларининг қайтганини расман эълон қилиши мумкин бўларди. Мана шу жиҳатдан ҳам якшанба оқшомидаги беллашувнинг қадри баланд.

Sky Sports маълумотлари асосида Абдулбасит Валихонов тайёрлади