Катта еттиликнинг саммити танқидларга қарамай Трампнинг меҳмонхонасида ўтадиган бўлди

 Бу ҳақда журналистларга Оқ уй маъмурияти раҳбари Мик Малвейни маълум қилди. 

“46-саммит 10-12 июнда бўлиб ўтади”, деб маълум қилган Малвейни. 

Унинг айтишича, саммит Майамидаги АҚШ президенти Дональд Трампга қарашли Trump National Doral Resort меҳмонхонасида бўлиб ўтади.

Оқ уй вакилининг таъкидлашича, Трамп саммитнинг ўзига тегишли меҳмонхонада ўтишидан фойда кўрмайди. “Мен танқидни тушунаман, лекин гап даромад ҳақида кетмаяпти”, деб қўшимча қилган Малвейни.

Унинг таъкидлашича, саммитни ўтказиш жойи 12 та номзод жой орасидан танлаб олинган. “Бу саммит ўтказилиши мумкин бўлган ягона жоймас, бироқ энг яхшисидир”, деб айтган Малвейни ва саммит бошқа жойларда ўтказилгандан кўра миллионлаб доллар арзонроққа тушишини қўшимча қилган. 

“Учрашувда эътибор жаҳон иқтисодиёти ўсиши ва унинг олдида турган чақириқларга қаратилади”, деб қўшимча қилган Оқ уй маъмурияти раҳбари.

Трамп амалдорларни ўзига тегишли меҳмонхоналарда тўхташга рағбатлантиргани учун танқид қилинган. ОАВ бунда манфаатлар ихтилофи борлигини таъкидлаган.