Миграция ва фуқароликни расмийлаштириш хизматини яхшилаш мақсадида сўров ўтказилмоқда

Ички ишлар вазирлигининг Миграция ва фуқароликни расмийлаштириш бош бошқармаси хизмат кўрсатиш даражасини яхшилаш, қуйи бўғинларда иш қандай ташкил этганини аниқлаш мақсадида сўров ўтказмоқда.

«Ҳурматли фуқаролар! Сизнинг ёрдамингиз билан Миграция ва фуқароликни расмийлаштириш хизмати фаолиятини яхшилаш мақсадида сўров ўтказилмоқда. 2 дақиқа вақтингизни аяманг!», дейилади эълонда.

Сўровда исм-фамилия ёки бошқа шахсий маълумотлар сўралмайди. Фақатгина жойлардаги «паспорт стол» ходимларининг одамлар билан муомала қилиш маданияти, ваколатли шахслар томонидан муаммони ҳал қилиш учун тамагирлик ҳолатлари кузатилиши, миграция бўлинмаларида фуқароларга кўрсатилаётган хизматлар даражаси, навбатсиз қабул қилиш учун таниш-билишчиликка йўл қўйилган-қўйилмагани ҳақидаги саволларга жавоб бериш сўралади.

Мазкур ҳавола орқали сўровда иштирок этиш мумкин.