Пойтахт йўлларида юқори технология орқали шахсни таниш, автоуловлар оқими ва уларнинг тезлигини аниқлаш имконига эга лойиҳа амалга оширилиши мумкин.
Тошкент шаҳар ҳокими Қозоғистоннинг Open Technologies Group компанияси вакиллари билан учрашди. Мулоқотда хорижий ҳамкорлар билан биргаликда “Ақлли шаҳар” лойиҳасини амалга ошириш ҳамда турли соҳаларда инновацион технологияларни қўллаш масаласи муҳокама қилинди.
Учрашувда йўллардаги хавфсизликни таъминлашга қаратилган лойиҳа атрофлича муҳокама қилинди. Open Technologies Group компанияси вакиллари Жанболат Сарсенов ва Руслан Асаубаев ўзлари тақдим этаётган дастурий таъминот маҳсулотларининг хусусиятлари бўйича атрофлича маълумот беришди.
Қайд этилишича, бу тизим нафақат йўллардаги ҳаракатланишни назорат қилади, балки юқори технология сабаб шахсни таниш мумкин. Шунингдек, унинг ёрдамида шаҳардаги автоуловлар оқими, уларнинг тезлигини аниқлаш мумкин. Шунингдек, буюртмачининг талабига кўра, бошқа функцияларни ҳам киритса бўлади.
Учрашувда, рақамли технологияларни ижтимоий соҳалар, жамоат транспорти тизими ва бошқа йўналишларда қўллаш бўйича ҳам фикр алмашилди.
