Ўзбекистон Хотин-қизлар қўмитаси раиси Элмира Боситхонова хонанда Лола Йўлдошеванинг интернетда кенг муҳокамаларга сабаб бўлаётган «Севгингни менга айт – 2» қўшиғи клипига муносабат билдирди. Бу ҳақда Kun.uz мухбири хабар бермоқда.
«Куни кеча Лола Йўлдошеванинг клипи чиқди. У «Ўзбекконцерт»ни лицензия олиб, бериш тартибини балки тўғри танқид қилгандир. Лекин атласни масхарабоз кийими қилгани, маънавият сўзини ўйинчоқ қилиб қўйгани – бу йигирма бешинчи кадр. Афсуски, буни яна ижтимоий тармоқда кўпчилик қўллаб-қувватлаган», – деди Боситхонова 15 ноябрь куни матбуот анжуманида.
Эслатиб ўтамиз, «Ўзбекконцерт» давлат муассасаси ўтган ойда хонанда Жаҳонгир Отажоновнинг лицензиясини «маънавий қадриятларимизга мутлақо ёт бўлган номуносиб ҳаракатлари» сабаб бекор қилган, аммо икки кун ўтиб, жамоатчиликнинг кескин эътирози ортидан хонандага қонуний ижод қилиш ҳуқуқини қайтариб берган эди.
Шу билан бир вақтда, бундан олдинроқ лицензиясидан маҳрум қилинган санъаткорлар Абдулла Қурбонов, Шаҳло Аҳмедова ва Ҳалима Ибрагимовага ҳам ижодий фаолиятини давом эттиришга рухсат берилганди. «Ўзбекконцерт»нинг бу қарори ижтимоий тармоқларда қизғин муҳокамаларга сабаб бўлди.
Айни мавзу Лола Йўлдошева 12 ноябрь куни эълон қилган клипда ҳам танқид остига олинган.
