«Бизга бундай иттифоқнинг нима кераги бор?»: Лукашенко Россия билан бирлашиш борасида ўз фикрини билдирди

17 ноябрда Беларусда парламент сайловлари бўлиб ўтмоқда ва мамлакат президенти Александр Лукашенко сайлов участкасида овоз бергач, Россия билан бирлашиш истиқболларига баҳо берди.

Лукашенко Россия билан ҳар йиллик савдо дефицити 9 млрд долларни ташкил қилишини ва Беларусь маҳсулотларининг Россия бозорларига қўйилмаслиги бу дефицитни камайтиришга ёрдам бермаслигини айтиб ўтди.

«Сен бирор бирлашмага кираётганингда, бундан ҳар ой ва йил тобора яхшироқ бўлишини кутасан. Бизда-чи, нима содир бўлмоқда? Бизга ҳар йил янги шартлар қўйилмоқда. Натижада биз иқтисодиётда нимадир йўқотганимиз-йўқотган», деб айтган Беларусь етакчиси.

«Бизга бундай иттифоқнинг нима кераги бор? Мен сизларга оддий, деҳқончасига айтмоқдаман!», деб қўшимча қилган Лукашенко.

Лукашенко Беларусь Россиядан ҳеч нарса сўрамаслиги, бироқ хўжалик субъектлари учун тенг шароитларни талаб қилаётганини айтган. 

Минск ва Москва келишуви

Минскда таъкидланишича, ҳозирда Москва икки давлат ўртасида 1999 йилда тузилган иттифоқ ҳақидаги келишувнинг бажарилишини талаб қилмоқда.

Беларусь ва Россия президентлари интеграция ҳужжатларини 8 декабрда, иттифоқ ташкил этилганининг 20 йиллигида имзолашни режалаштирмоқда.

«Агар ҳужжатлар конституцияга ва жамиятимизнинг асосий тамойилларига зид бўлса, мен томонимдан имзоланмайди. Бу борада хавотир қилманг», деб айтган Беларусь президенти.

Лукашенко, шунингдек, 2020 йилда ўтадиган навбатдаги президент сайловларида иштирок этишини маълум қилган.

«Агар одамлар мени бирор сайловларда қўллаб-қувватлашмаса, хафа бўлмайман. Мен етарлича анча вақт ишладим. Бу сайловларга менинг номзодимни илгари суриш ҳақида сиз ўйланг. Агар барқарорликни, давлат равнақини қадрласангиз, сизни сотмасликлари ва бирор бурчакка тиқишларини истамасангиз, унда келиб, «эшит, президент, сан ҳали бақувватсан», деб айтинглар», дея таъкидлаб ўтган Лукашенко.

Беларусь президентининг сўзларига кўра, у «агар халқ илтимос қилса», 2025 йилда 7-муддатга номзодини илгари суришни ҳам режалаштираётгани келиб чиқмоқда.