Ўзбекистон Афғонистонга гуманитар ёрдам етказиб берди

Ўзбекистон «Тинчлик учун» хайрия акцияси доирасида йиғилган гуманитар ёрдамни Афғонистоннинг Мозори-Шариф шаҳрига етказиб берди. 

«Ўзбекистон темир йўллари» акциядорлик жамияти хабарига кўра, мазкур хайрия акцияси Ўзбекистон ёшлари умумжаҳон ассоциацияси томонидан Афғонистон Ислом Республикасида яшовчи ёшларни қўллаб-қувватлаш мақсадида жорий йилнинг 1 сентябридан 1 октябрига қадар бўлган муддатда амалга оширилди. 

Ундан келиб тушган барча маблағлар ёшлар учун зарур бўлган китоб (бадиий адабиёт), ўқув-қуроллар, кийим-кечак ва спорт анжомларини харид қилиш учун сарфланади. 

Қайд этилишича, буларнинг барчаси Афғонистондаги ота-она қарамоғисиз қолган, оғир шароитларда яшаётган этник ўзбеклар ва афғон ёшларининг муаммоларига кенг жамоатчилик эътиборини қаратиш ҳамда уларни қўллаб-қувватлашга йўналтирилган бўлиб, «Ўзбекистон темир йўллари» АЖ томонидан қўшни давлатга поезд ва юк машиналарида етказиб берилди.